ឃាត់ខ្លួនជនបង្ករចលាចលសង្គម និងបំពុលសង្គម ២នាក់ ពាក់ព័ន្ធការបង្ហោះព័ត៌មានមិនពិតថា “មានការឆ្លងជម្ងឺផ្លូវដង្ហេីមវីរុសកូរ៉ូណា នៅខេត្តសៀមរាប”
សៀមរាប ៖ មន្ត្រីនគរបាលខេត្តសៀមរាប បានអោយដឹងនៅព្រឹកនេះថា នៅល្ងាចថ្ងៃទី២៨ ខែមករា ឆ្នាំ២០២០ សមត្ថកិច្ចនគរបាលខេត្តសៀមរាប បានហៅមនុស្សប្រុសស្រី២នាក់ មកសាកសួរ ពាក់ព័ន្ធនឹងការផ្សាយព័ត៌មានមិនពិត តាមបណ្ដាញសង្គមហ្វេសប៊ុក ទាក់ទងនឹងការឆ្លងជម្ងឺផ្លូវដង្ហេីមវីរុសកូរ៉ូណា នៅខេត្តសៀមរាប ។
សមត្ថកិច្ចបញ្ជាក់ថា បុរសនិងយុវតីទាំង២នាក់នេះ បានប្រេីគណនេយ្យរបស់ខ្លួនបង្ហោះព័ត៌មានតាមបណ្តាញសង្គមហ្វេសប៊ុក ដោយអះអាងថា មានករណីឆ្លងវីរុសកូរ៉ូណា ចំនួន៤ករណី នៅសណ្ឋាគារប៉ាស៊ីហ្វិក ខេត្តសៀមរាប ។
ការផ្សាយនេះ ត្រូវបានសាលាខេត្តសៀមរាបចេញសេចក្ដីបំភ្លឺមួយ ដោយបានបញ្ជាក់ថា គ្មានករណីឆ្លងជម្ងឺផ្លូវដង្ហើមវីរុសកូរ៉ូណា កេីតឡេីងនៅសណ្ឋាគារណាមួយ ក្នុងខេត្តសៀមរាបនោះទេ ។
ការផ្សាយថា មានជនជាតិចិន ៤នាក់ ឆ្លងជម្ងឺផ្លូវដង្ហេីមនៅខេត្តសៀមរាប អាចជាចេតនាអាក្រក់របស់ជនបំពុលសង្គម ដេីម្បីបំភ័យភ្ញៀវទេសចរណ៍ជាតិ និងអន្តរជាតិ កុំអោយមកទស្សនាប្រាសាទអង្គរវត្ត ខេត្តសៀមរាប និងបង្ករចលាចលសង្គមតែប៉ុណ្ណោះ ។
សមត្ថកិច្ចមិនទាន់បញ្ជាក់ថា មនុស្សទាំងពីរនាក់នេះ គួរអប់រំណែនាំ ឬកសាងសំណុំរឿង ដេីម្បីបញ្ជូនទៅតុលាការនោះទេ ។ ប៉ុន្តែតាមមាត្រា ៤២៥ នៃក្រមព្រហ្មទណ្ឌ បានចែងថា បទក្លែងព័ត៌មាន ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ ២ឆ្នាំ និងពិន័យជាប្រាក់ពីពីរលានរៀលទៅបួនលានរៀល ៕
